…

Општо-познат е фактот дека иднината на блузот зависи, пред сè, од работата на помали, независни дискографски куќи чија посветеност кон идиомот е круцијална движечка форма за егзистенцијалното опстојување на споменатиот музички израз. Овие фирми најчесто се водени од љубителите на блузот кои тоа можат да си го дозволат, или, пак, музичари чија визија се огледува во секојдневната борба за опстанокот на блузот и неговото доближување до што е можно поголемиот аудиториум на музичките конзументи. Могумина, според денешните стандарди, големи имиња на блузот, својот успех го должат токму на работата на овие мали фирми кои им дале шанса што секако не би ја имале кај големите дискографски концерни. Една од такви истакнати „независни“ куќи со донкихотовска провениенција секако е и француската „Диксифрог Рекордс“. Во последниве години оваа фирма стана синоним меѓу љубителите на блузот, рокенролот и други музички содржини, предсе поради одличен материјал, без оглед дали се работи за сопствен продукт или лиценцирани изданија. Кога љубител на музиката ќе набави било што од „Диксифрог Рекордс“, тој знае што може да очекува: квалитетно име, одлична изведба и силна продукција. Имав можност да слушнам многу изданија на „независните“ Французи и никогаш не сум слушнал лош производ во секоја смисла. Тоа секако зборува за квалитетот што во сета таа работа го вложуваат Филип Ланглоа и неговите колеги, задолжени за продукцијата и репертоарот на „Диксифрог Рекордс“. Бројни изданија на оваа фирма можат да се слушнат редовно на втората програма на македонското радио како и во емисијата „Моџо Блуз“ на Канал 103.
    Во продолжение следат информации за најновата продукција на „Диксифрог Рекордс“ која заслужува внимание:

Томи Кастро Бенд – Крив за љубов (ДФЦД 8524)

„Блузот е во добри раце. Томи има глас, звук и вистински намери да допре до срцето на секого“. Ова за Томи Кастро го кажа Карлос Сантана, а он секако може да знае кој е добар, нели? „Крив за љубов“ е, според мене, досега најдобар албум на Кастро кој би требало одлично да помине кај љубителите на блузот. Тој претставува извонреден микс на различни стилови како ритам и блузот, потоа фанки „свомп“ рокот, Мемфис соулот, потсетувајќи на моменти на госпел соулот на Ал Грин,

сепак со беспрекорно чувство на блузот во секоја нота на гитарата на Томи Кастро и неговиот вокал. Она што е особено важно за овој диск е и фактот што на него за последен пат е забележан гласот на легендарниот Џон Ли Хукер пред неговата смрт на 21 јуни, 2001. Обавезно слушање!

Лери Мекреј – Блузот е мој бизнис (ДФЦД 8522)

Лери е во право: блузот е негов бизнис, а тој е одличен бизнисмен! Неговиот последен проект секако ќе му донесе нови обожаватели бидејќи е изнијансирано подговтвуван за пошироката публика, со определена доза на „мејнстрим“ звукот како совршен производ на современата блуз продукција. Лери е на сцената веќе подолго време и, се чини, сега е вистинско време за него – да се здобие со можност да го прифати поширокиот аудиториум слушатели и наклоност на музичката критика. Оригиналниот материјал на дискот е комбиниран со стандардите на Тини Хоџис, Ворен Хејнс, Џери Реговој, Бови и Керни, Тод Волф и Дејв Стин. Неколку извонредни „бавни“ блузови зачинети со фанки рок моменти, а сето тоа под диригентската палка на легендарниот продуцент Мајк Вернон се гаранција за повторни слушања. Овој пат Лери Мекреј, со својот пристап секако ќе придобие и голем број љубители на рокот, нови следбеници на неговиот блуз.

Папа Чаби – Ја претставува њујоршката блуз сцена – повторно (ДФЦД 8523)

По својот последен диск „Вратен назад“ (ДФЦД 8520) на кој ги исполни своите омилени композиции од шеесетите години, Папа Чаби се врати на дискографската сцена со својот најнов проект, втор во серија претставувања на современата нјујоршка блуз сцена. И овој пат Чаби се појавува во одлично друштво на музичари кои заслужуваат внимание. Ирвин Луис Латин, Зек Зунис, Луис Гејтвуд, Џо Тејно, Стив Логен и Мет Смит се имиња кои веројатно ништо не ви значат во животот, како и на повеќето други надвор од Њујорк, но благодарение на Папа Чаби, ситуацијата за споменатите музичари можеби ќе се смени кон подобро и тоа мошне брзо! Блузот на нјујоршката сцена не може да се спореди со блузот во класична смисла, туку се работи за поширок поим кој подразбира современа музичка надградба во која се инкорпорирани различни, често диспаратни музички содржини како ритам и блузот, Латино рок, хип хоп и сешто помеѓу! Ова оригинално сочинение секако ќе ве однесе на подиум за играње, доколку сте живи, се разбира! Проверете кои се овие „нови дечки“ на блуз мафијата на Папа Чаби, нема да зажалите!

id='strNaslov5'>

Мејсон Кејси – Душа на огин (ДФЦД 8521)

Името на Мејсон Кејси во моментот сè уште не е име кое фигурира како познато во поширокиот круг на љубителите на блузот, но само е прашање на времето кога работиве ќе се сменат во полза на Мејсон. Доколку сакате вашиот блуз во фанки манир, зачинет со одлична усна хармоника, „чаден“ вокал и одличен гитаристички удел на Папа Чаби и Зек Зунис, тогаш ова е диск за вас! Од првите тактови на „Вуду Буги“, ритамот ве опседнува и не ве напушта до последните ноти на сјајната изведба на „Луцил“ од репертоарот на Литл Ричард. Доколку планирате сериозна журка, нема да згрешите со Мејсон Кејси! Тој е одличен музичар и благодарение на „Диксифрог Рекордс“ стана достапен на европските љубители на блузот. Да се надеваме, дека наскоро ќе следува и европска турнеја.

Бил Пери – Запали го тоа (ДФЦД 8519)

Најновиот диск на Бил Пери секако ќе го потврди неговиот статус на современата светска блуз сцена. Омилениот гитарист на Мајкл Хил овој пат се претставува со колекција композиции кои ќе ги задоволат сите љубители на ваков вид музика. Со песни направени во соработка со гитаристот Џими Вивино и по еден комад од Папа Чаби и Семи Дејвис, Бил Пери и овој пат ја потврдува својата репутација на еден од најквалитетните експоненти на блузот од помладата генерација. Оваа колекција песни сосема комфорно ќе се смести во сечија блуз колекција која претендира на сериозност и квалитет. Доколку ве интересира квалитетен музички материјал исполнет со авторската страст и автентичен звук, тогаш не барајте понатаму. Сето тоа ќе го имате со најновиот диск на Бил Пери!

Тино Гонзалес – Модерен скитник (ДФЦД 8515)

Време е љубителите на блузот во светот (тие што уште не го знаат) да го запознат: Американски музичар со латино-американски корени, Тино Гонзалес е име кое бара ваше внимание! Неговиот најнов диск на „Диксифрог Рекордс“ е полн со одлични композиции, извонредна гитара и со емоции набиен вокал. Наслов на неговиот последен проект најдобро ги карактеризира неговите музички идеи, имено, Гонзалес е страствен набљудувач на светот околу себе, човек кој своите визии прекрасно ги преточува во музиката. Овој диск, снимен во Германија, е последица на неговите согледувања и размислувања за европската историја (Играјќи со ангелите, Блуз за Марија), содржи и лични посвети на саксофонистот Гровер Вошингтон, на нашата планета (Ми тиера, со карактеристичен Сантана звук!) и кон своите блуз корени (Роден под лош знак). Со одличен придружен состав и извонредна дувачка секција, Тино Гонзалес се надмина себеси! Материјал кој не смее да се пропушти и тоа важи за секого!